ମହଙ୍ଗା ମାଡ଼: ପୁଣି ବଢିବ ହରଡ଼ ଡାଲି

ପୁଣି ଗ୍ରାହକଙ୍କୁ ମହଙ୍ଗା ମାଡ । ବଢିବାକୁ ଯାଉଛି ଅତ୍ୟାବଶ୍ୟକୀୟ ହରଡ଼ ଡାଲିର ଦର । କିଲୋପିଛା ୧୫୦ଟଙ୍କା ଟପିବ ହରଡ ଡାଲି । ହରଡ଼, ବୁଟ ଫସଲ ପ୍ରଭାବିତ ହେବା କାରଣରୁ ଦର ବୃଦ୍ଧି ହେବାର ସମ୍ଭାବନା ଦେଖାଦେଇଛି । କର୍ଣ୍ଣାଟକ, ମହାରାଷ୍ଟ୍ର, ଛତିଶଗଡ଼ରେ ହରଡ଼ ଓ ବୁଟ ଡାଲିର ଉତ୍ପାଦନ ଚଳିତବର୍ଷ ହ୍ରାସ ପାଇଛି । ଅଦିନିଆ ବର୍ଷା ଓ ପୋକ ଯୋଗୁ ଆଶାନୁରୂପ ଫସଲ ହୋଇନି । ତେଣୁ ଡାଲି ପାଇଁ ଭାରତ ବାହାର ରାଜ୍ୟ ମିଆଁମାର, ବାଂଲାଦେଶ ଓ ଦକ୍ଷିଣ ଆଫ୍ରିକା ଉପରେ ନିର୍ଭର କରିବ । ତେଣୁ ହରଡ଼ ଡାଲି ଦର ବୃଦ୍ଧି ପାଇବାର ଆଶଙ୍କା ଉପୁଜିଛି । ସୂଚନା ମୁତାବକ, ଦୈନିକ ୨ଶହ ଟନ୍ ହରଡ଼ ଓ ବୁଟ ଡାଲି ମାଲଗୋଦାମ ଆମଦାନୀ କରୁଛି ।

ହେଲେ ଛତିଶଗଡ଼ ଓଡ଼ିଶା ସୀମାବର୍ତି ରାଜ୍ୟ ହୋଇଥିବାରୁ ଏଠାରୁ ଅଧିକ ଆମଦାନୀ ହୋଇଛି । ମାତ୍ର ସେଠାରେ ବି ଏବର୍ଷ ଡାଲି ଚାଷ ଭଲ ହୋଇନଥିବାରୁ ଓଡ଼ିଶାର ଚିନ୍ତା ବୃଦ୍ଧି ବଢିଲାଣି । କର୍ଣ୍ଣାଟକ, ମହାରାଷ୍ଟ୍ର ଏବଂ ଛତିଶଗଡ଼ରେ ହରଡ଼ ଓ ବୁଟ ଉଭୟ ଫସଲରେ ବ୍ୟାପକ କ୍ଷତି ହୋଇଛି । ତେଣୁ ଦେଶି ଡାଲି ନୁହେଁ ବିଦେଶୀ ଡାଲି ଚାହିଦା ମେଂଟେଇବ ବୋଲି ଜଣାପଡ଼ିଛି । ଫଳରେ ହରଡ ଡାଲି କିଲୋ ୧୫୦ଟଙ୍କା ଟପିବ ବୋଲି ବ୍ୟବସାୟୀମାନେ ଆଶଙ୍କା କରୁଛନ୍ତି । ଏବେ ହରଡ଼ ଡାଲି କିଲୋପିଛା ଦର ୧୧୧ରୁ ୧୨୦ଟଙ୍କା ଥିବା ବେଳେ ବୁଟଡାଲି ଦର ୬୧ରୁ ୬୫ଟଙ୍କା ମଧ୍ୟରେ ରହିଛି ।