ରାହୁଲଙ୍କୁ ଘର ଦାନ କଲେ ମହିଳା

କଂଗ୍ରେସ ନେତା ରାହୁଲ ଗାନ୍ଧୀଙ୍କୁ ଘର ଦାନ କରିଛନ୍ତି ଜଣେ ମହିଳା । ରାହୁଲଙ୍କ ଲୋକସଭା ସଦସ୍ୟତା ରଦ୍ଦ ହେବା ପରେ ତାଙ୍କୁ ମିଳିଥିବା ସରକାରୀ ବଙ୍ଗଳା ବି ଖାଲି କରିବାକୁ ପଡିଲା । ଏହାପରେ କଂଗ୍ରେସ ନେତାଙ୍କ ପକ୍ଷରୁ ‘ମେରାଘର, ରାହୁଲ ଗାନ୍ଧୀଙ୍କ ଘର’ ନାମରେ ଏକ କ୍ୟାମ୍ପେନ୍ ଆରମ୍ଭ କରାଯାଇଛି । ଏହାରି ଭିତରେ ଦିଲ୍ଲୀରେ ରହୁଥିବା ଦିଲ୍ଲୀର ରାଜକୁମାରୀ ଗୁପ୍ତା ନାମକ ଜଣେ ମହିଳା ନିଜର ଏକ ୪ମହଲା କୋଠା ରାହୁଲ ଗାନ୍ଧୀଙ୍କ ନାଁରେ ଲେଖିଦେଇଛନ୍ତି ।

ସୂଚନା ମୁତାବକ ରାହୁଲ ଗାନ୍ଧୀଙ୍କ ଲୋକସଭା ସଦସ୍ୟତା ରଦ୍ଦ ହେବା ପରେ ତାଙ୍କୁ ଦିଲ୍ଲୀ ତୋଗଲକ ଲେନରେ ମିଳିଥିବା ସରକାରୀ ଭବନକୁ ଛାଡିବାକୁ ନୋଟିସ୍ ଜାରି କରାଯାଇଥିଲା । ଏପ୍ରିଲ ୨୨ତାରିଖ ସୁଦ୍ଧା ସରକାରୀ ଘର ଛାଡିବାକୁ ତାଙ୍କୁ ନୋଟିସ ଜରିଆରେ ନିର୍ଦ୍ଦେଶ ଦିଆଯାଇଛି । ଏହାପରେ ରାହୁଲ ଗାନ୍ଧୀ କେଉଁଠି ରହିବେ ତା’କୁ ଜୋରଦାର ଚର୍ଚ୍ଚା ହେଉଥିବା ବେଳେ ଦଳର ଅନେକ ନେତା ଓ ମନ୍ତ୍ରୀ ରାହୁଲଙ୍‌କୁ ଘର ଯୋଗାଇ ଦେବାକୁ ଆଗେଇ ଆସିଥିଲେ । ହେଲେ ରାଜକୁମାରୀ ଗୁପ୍ତା ସିଧାସଳଖ ରାହୁଲ ଗାନ୍ଧୀଙ୍କ ନାଁରେ ଏକ ୪ମହଲା କୋଠା ଲେଖିଦେବା ପରେ ଏବେ ପ୍ରଶ୍ନ ଉଠୁଛି । ବାସ୍ତବରେ ରାହୁଲ ଗାନ୍ଧୀ କ’ଣ ରାଜକୁମାରୀ ଗୁପ୍ତାଙ୍କ ଘରେ ରହିବେ ନା ପୂର୍ବ ଯୋଜନା ମୁତାବକ ସୋନିଆ ଗାନ୍ଧୀ କିମ୍ବା ପ୍ରିୟଙ୍କା ଗାନ୍ଧୀଙ୍କ ପାଖରେ ରହିବେ ।