ଗୋ-ସୁରକ୍ଷା ପ୍ରତି ସ୍ୱତନ୍ତ୍ର ଗୁରୁତ୍ୱ ଦେବାକୁ ବିଭିନ୍ନ ଅନୁଷ୍ଠାନ ଆହ୍ୱାନ ଦେଉଛନ୍ତି । ବାରମ୍ବାର ରାସ୍ତାରେ ଗୋରୁ ବୋଝେଇ ଟ୍ରକ୍ ଅଟକାଯାଉଛି । ହେଲେ ଫଳଶୂନ୍ । ଏବେ ବି ବାଂଲାଦେଶକୁ ଲକ୍ଷଲକ୍ଷ ଗୋରୁ ଚାଲାଣ ହେଉଛନ୍ତି ବୋଲି କହିଛନ୍ତି କୋଲକାତାର ଏକ କଲେଜର ଇତିହାସ ପ୍ରଫେସର ଅନୀଶ ସେନଗୁପ୍ତ ।
ବାଂଲାଦେଶ ଏକ ମୁସଲମାନ ବହୁଳ ଦେଶ ହୋଇଥିବାରୁ ସେଠାରେ ଯେତିକି ଗୋରୁ ଅଛନ୍ତି ଏହା ସେମାନଙ୍କର ଗୋମାଂସ ଚାହିଦା ପୂରଣ କରିପାରୁନି । ଏଣୁ ଭାରତରୁ ବାଂଲାଦେଶକୁ ସ୍ୱାଧୀନତା ପୂର୍ବରୁ ଏଯାବତ୍ ଗୋରୁ ଚାଲାଣ ହୋଇଆସୁଛି । ଏହା କିଛି ଲୋକଙ୍କର ରୀତିମତ ବ୍ୟବସାୟରେ ପରିଣତ ହୋଇଛି ବୋଲି ପ୍ରଫେସର ସେନଗୁପ୍ତ କହିଛନ୍ତି । ଏବେ ସ୍ୱାଧୀନତାର ୭୫ବର୍ଷ ପରେ ସେହି ଏକା ଆର୍ôଥକ ନୀତି ଏ କ୍ଷେତ୍ରରେ ଲାଗୁ ହୋଇଛି । ଗୋରୁମାନଙ୍କୁ ନଈ ପହଁରାଇବା ସହ ବିପଦପୂର୍ଣ୍ଣଭାବେ ସୀମା ପାର କରାଇ ଏହି ଚୋରା କାରବାର କରାଯାଉଛି । ପ୍ରତିବର୍ଷ ୨ନିୟୁତରୁ ଅଧିକ ଗୋରୁ ଚୋରାରେ ବାଂଲାଦେଶ ଚାଲାଣ ହେଉଛନ୍ତି ।
ଭାରତ-ବାଂଲା ସୀମାନ୍ତରେ ୨ହଜାର ୨୧୭କିଲୋମିଟର ବାଡ ଦିଆଯାଇଛି । ହେଲେ ନଈ ଓ ଜଳଭୂମି ଥିବାରୁ ୫୭୯କିଲୋମିଟର ଅଂଚଳରେ ବାଡ ଦିଆଯାଇପାରୁନି । ଯେଉଁଠି ବାଡ ଅଛି, ସେଠି ବି ଅନେକ ଗଳାବାଟ ରହିଛି । ଯେଉଁଠି ବାଡ ନାହିଁ ସେଠାରେ ହିଁ ଗୋରୁଙ୍କୁ ନଈରେ ପହଁରାଇ ନିଆଯାଉଥିବା କହିଛନ୍ତି ଅନୀଶ । ମୁଖ୍ୟତଃ ପଞ୍ଜାବ, ହରିୟାଣା, ରାଜସ୍ଥାନ ଓ ପଶ୍ଚିମ ଉତରପ୍ରଦେଶରୁ ଗୋରୁ ଚୋରା ବେପାର ଜାରି ରହିଥିବା କହିଛନ୍ତି ସେନଗୁପ୍ତ । ଗୋରୁ ଚାଲାଣକାରୀ ଧରାପଡିଲେ ସୁରକ୍ଷା କର୍ମୀଙ୍କ ଦ୍ୱାରା ଗିରଫ ହେବା ସହ ଗୁଳିମାଡ ବି ହେଉଛି । ତଥାପି ଭଲ ରୋଜଗାର ହେଉଥିବାରୁ ଏହାକୁ ବ୍ୟବସାୟୀ ଖାତିର କରୁନାହାନ୍ତି । ଗୋରୁମାନଙ୍କୁ ନଈ ପାର କରାଇ ବହୁ ଲୋକ ଜୀବିକା ନିର୍ବାହ କରୁଛନ୍ତି । ଜଣେ ଲୋକ ଗୋଟିଏ ଗୋରୁକୁ ନଈ ପହଁରାଇ ପାର କରାଇବା ପରେ ତା’କୁ ୧୫ଶହରୁ ୨୫ଶହ ପର୍ଯ୍ୟନ୍ତ ଟଙ୍କା ମିଳୁଥିବା କହିଛନ୍ତି ପ୍ରଫେସର ସେନଗୁପ୍ତ । ଏପରି କି କିଛି ସୁରକ୍ଷା କର୍ମୀ ବି ଟଙ୍କା ନେଇ ଗୋଚାଲାଣକାରୀଙ୍କୁ ଛାଡି ଦେଉଥିବା ଅଭିଯୋଗ ହେଉଛି । ଏଣୁ ଏବେ ଗୋରୁ ଚାଲାଣ ଥମିବା ବଦଳରେ ଦିନକୁ ଦିନ ବୃଦ୍ଧି ପାଇବାରେ ଲାଗିଛି ବୋଲି କହିଛନ୍ତି କୋଲକାତା କଲେଜର ପ୍ରଫେସର ଅନୀଶ ସେନଗୁପ୍ତ । ସେହିପରି ସ୍ୱାଧୀନତା ପରଠାରୁ ପ୍ରତିବର୍ଷ ପ୍ରାୟ ୨୦ଲକ୍ଷ ଗୋରୁ ଭାରତରୁ ବାଂଲାଦେଶକୁ ଚାଲାଣ ହେଉଥିବା ଏକ ଜାତୀୟ ଗଣମାଧ୍ୟମ ରିପୋର୍ଟରୁ ଜଣାପଡିଛି । ଏଣୁ ଏଭଳି ସ୍ଥିତିରେ ଯଦି ଗୋ-ଚାଲାଣ ବିରୋଧରେ ଉଭୟ କେନ୍ଦ୍ର ଓ ବିଭିିନ୍ନ ରାଜ୍ୟସରକାର ପଦକ୍ଷେପ ନ ନିଅନ୍ତି ତେବେ ଖୁବଶୀଘ୍ର ଭାରତରୁ ଗୋବଂଶ ଲୋପ ପାଇଯିବ ଏଥିରେ ତିଳେମାତ୍ର ସନ୍ଦେହ ନାହିଁ ।
