ଜୋର ଧରିଲାଣି ରାଜନଗର ରାଜନୀତି । ୨୦୨୪ସାଧାରଣ ନିର୍ବାଚନ ପାଇଁ ସରଗରମ ରାଜନଗର ନିର୍ବାଚନମଣ୍ଡଳୀ । ଆସନ୍ତା ନିର୍ବାଚନରେ ଏଠାରେ କିଏ ହେବେ ବିଜେଡି ପ୍ରାର୍ଥୀ । ବର୍ତମାନ ବିଜେଡି ବିଧାୟକ ଧ୍ରୁବ ସାହୁ ହିଁ ପ୍ରାର୍ଥୀ ହେବେ ନା ତାଙ୍କ ସ୍ଥାନରେ ଆଉକିଏ ବାଜିମାରିନେବ ତା’କୁ ନେଇ ଲାଗିରହିଛି କଳ୍ପନାଜଳ୍ପନା । ଏହାରି ଭିତରେ ଆସିଛି କଂଗ୍ରେସର ପୂର୍ବତନ ବିଧାୟକ ଅଂଶୁମାନ ମହାନ୍ତିଙ୍କ କଥା ।
ଅଂଶୁମାନ ବିଜେଡ଼ିରେ ମିଶିବା ସହ ରାଜନଗରରୁ ବିଧାୟକ ପ୍ରାର୍ଥୀ ହେବ ବୋଲି ଆଲୋଚନା ହେଉଛି । ଗତ ୨୦୧୪ ନିର୍ବାଚନରେ କଂଗ୍ରେସରୁ ଏଠାରେ ବିଧାୟକ ଭାବେ ନିର୍ବାଚିତ ହୋଇଥିଲେ ଅଂଶୁମାନ । ମାତ୍ର ୨୦୧୯ରେ ତାଙ୍କୁ ପରାଜୟର ସ୍ୱାଦ ଚାଖିବାକୁ ପଡିଥିଲା । ଏବେ କଂଗ୍ରେସ ଦିନକୁ ଦିନ ଦୁର୍ବଳ ହେଉଥିବା ବେଳେ ଅଂଶୁମାନ ବିଜେଡ଼ିରେ ଯୋଗାଦେବା କଥା ଚର୍ଚ୍ଚା ହେଉଛି । ଏପରି କି ଏବେଠାରୁ ରାଜନଗରରେ ଅଂଶୁମାନ ବିଭିନ୍ନ କାର୍ଯ୍ୟକ୍ରମ କରୁଥିବା ବେଳେ ସେ କୌଣସି ଦଳୀୟ ଚିହ୍ନ ବ୍ୟବହାର କରୁନାହାନ୍ତି । ନା କଂଗ୍ରେସ ନେତୃତ୍ୱଙ୍କ ଫଟୋ ଦେଉଛନ୍ତି ନା ବିଜେଡ଼ି ନେତାଙ୍କ ଫଟୋ ଦେଖିବାକୁ ମିଳୁଛି । ବିଜେଡ଼ିରେ ସାମିଲ ହେବା ନେଇ ଅଂଶୁମାନ ତାଙ୍କ ସମର୍ଥକମାନଙ୍କୁ କହୁଥିବା କଥା ଆଲୋଚନା ହେଉଛି ।
ତେବେ ସତରେ କ’ଣ ବିଜେଡ଼ି ଧ୍ରୁବଙ୍କ ବଦଳରେ ଅଂଶୁମାନଙ୍କୁ ଦଳୀୟ ଟିକେଟ୍ ଦେବ ବୋଲି ଏବେ ଚର୍ଚ୍ଚା ଜୋର ଧରିଛି । କାରଣ ଅଂଶୁମାନ ହେଉଛନ୍ତି ପୂର୍ବତନ ମନ୍ତ୍ରୀ ନଳିନୀ ମହାନ୍ତିଙ୍କ ପୁଅ । ନଳିନୀ ବିଜୁ ଲିଗାସିରେ ସୁପର ଚିପ୍ ମିନିଷ୍ଟର ଭାବେ ବେଶ୍ ଜଣାଶୁଣା ଥିଲେ । ଏପରି କି ସେ ଓ ତାଙ୍କର କିଛି ସମର୍ଥକ ସେ ହିଁ ନବୀନଙ୍କୁ ବିଦେଶରୁ ଆଣି ରାଜ୍ୟରେ କ୍ଷମତାରେ ବସାଇଥିବା ଅନେକଥର ଗଣମାଧ୍ୟମରେ ଚର୍ଚ୍ଚା ହୋଇଛି । ମାତ୍ର ତାଙ୍କୁ ବିଜେଡ଼ିରୁ ବହିଷ୍କୃତ କରାଯିବା ପରେ ତାଙ୍କ ପୁଅ ଅଂଶୁମାନ କଂଗ୍ରେସରେ ଯୋଗଦେବା ସହ ଗତ ୨୦୧୪ ନିର୍ବାଚନରେ ବିଜୟୀ ହୋଇଥିଲେ । ହେଲେ ଏବେ କିନ୍ତୁ ବଦଳିଯାଇଛି ରାଜନୈତୀକ ଚିତ୍ର ।
ବିଜେଡ଼ି ୨୫ବର୍ଷ ଧରି ଶାସନ କ୍ଷମତାରେ ଥିବା ବେଳେ ତା’ର ପତିଆରା ମଧ୍ୟ ଦିନକୁ ଦିନ ବୃଦ୍ଧି ପାଇବାରେ ଲାଗିଛି । ଏଣୁ ରାଜନୀତିରେ ସବୁକିଛି ସମ୍ଭବ ଷ୍ଟାଇଲରେ ଅଂଶୁମାନ ବିଜେଡ଼ିରେ ସାମିଲ ହୋଇପାରନ୍ତି । ଆଉଏକ ଗୁରୁତ୍ୱପୂର୍ଣ୍ଣ କଥା ହେଉଛି ଅଂଶୁମାନ ଏବେ ବି କେନ୍ଦ୍ରାପଡ଼ା ଜିଲ୍ଲା କଂଗ୍ରେସ ସଭାପତି ଅଛନ୍ତି । ଜଣେ ଯୁବନେତା ଭାବେ ତାଙ୍କର ରହିଛନ୍ତି ଅନେକ ସମର୍ଥକ । ତେଣୁ ବିଜେଡ଼ି ଅଂଶୁମାନଙ୍କୁ ଦଳକୁ ନେଇ ଗୋଟିଏ ଗୁଳିରେ ୨ଟି ଶିକାର କରିପାରିବ ବୋଲି କୁହାଯାଉଛି । ଗୋଟିଏପଟେ ଅଂଶୁମାନ କଂଗ୍ରେସ ଛାଡି ବିଜେଡ଼ିରେ ସାମିଲ ହେଲେ କଂଗ୍ରେସର ଅନେକ ନେତା ବି ବିଜେଡିରେ ମିଶିବାର ସମ୍ଭାବନା ରହିଛି । ଯେଉଁଥିପାଇଁ ବିଜେଡିର ଶକ୍ତି ପୂର୍ବାପେକ୍ଷା ଆହୁରି ବୃଦ୍ଧି ପାଇବ । ତେଣୁ ଆଗାମୀ ୨୦୨୪ ସାଧାରଣ ନିର୍ବାଚନରେ ରାଜନଗରେ ଏକ ରୋଚକ ସ୍ଥିତି ସୃଷ୍ଟି ହେବ ବୋଲି କହୁଛନ୍ତି ରାଜନୈତୀକ ସମୀକ୍ଷକ ।
