ରଦ୍ଦ ହେବ ଲକ୍ଷାଧିକ ରାସନ୍ କାର୍ଡ

ଦେଶରେ ଗରିବ ଓ ଭୂମିହୀନଙ୍କୁ ମାଗଣାରେ ରାସନ ଯୋଗାଇଦେବାକୁ ଅନେକ ଯୋଜନା କରୁଛନ୍ତି ଉଭୟ କେନ୍ଦ୍ର ଓ ରାଜ୍ୟ ସରକାର । ହେଲେ ଏହାର ଫାଇଦା ଉଠାଉଛନ୍ତି ଅନେକ ଅଯୋଗ୍ୟ ହିତାଧିକାରୀ । ଏଣୁ ଏହାକୁ ରୋକିବାକୁ ସରକାର ଆଣିଛନ୍ତି ନୂଆ ନିୟମ । ନୂଆ ନିୟମ ଅଧୀନରେ ଅନେକ ଅଯୋଗ୍ୟ ହିତାଧିକାରୀଙ୍କ ରାସନ କାର୍ଡ ରଦ୍ଦ ହେବ । ଏବେ ଆଉ ମାଗଣା ରାସନର ସୁବିଧା ପାଇପାରିବେନି ଅଯୋଗ୍ୟ ହିତାଧିକାରୀ । କେନ୍ଦ୍ର ସରକାରଙ୍କ କହିବା ମୁତାବକ ଚଳିତବର୍ଷ ରାସନ କାର୍ଡଧାରୀମାନେ ମାଗଣା ରାସନର ଲାଭ ପାଇପାରିବେନି । ଯେଉଁ ଅଯୋଗ୍ୟ ହିତାଧିକାରୀ ମାଗଣାରେ ରାସନ ନେଉଛନ୍ତି ସେମାନଙ୍କ ବିରୋଧରେ ନିଆଯିବ କଡ଼ା କାର୍ଯ୍ୟାନୁଷ୍ଠାନ । ଏପରିକ୍ଷେତ୍ରରେ ଅଯୋଗ୍ୟ ହିତାଧିକାରୀଙ୍କୁ ଚିହ୍ନଟ ପାଇଁ ସରକାର ନୂଆ ନିର୍ଦ୍ଦେଶାବଳୀ ଜାରି କରିଛନ୍ତି । ଏଣୁ ସରକାର ଏମାନଙ୍କୁ ଯଥାଶୀଘ୍ର ରାସନ କାର୍ଡ ଫେରାଇ ଦେବାକୁ କଡ଼ା ନିର୍ଦ୍ଦେଶ ଦେଇଛନ୍ତି । ଯଦି ଏମାନେ ରାସନ କାର୍ଡ ନ ଫେରାନ୍ତି ତେବେ ଖାଦ୍ୟ ବିଭାଗ ଟିମର ଯାଂଚ୍ ପରେ ଏହାକୁ ବାତିଲ୍ କରାଯିବ । ଏପରି କି ଏଭଳି ଲୋକଙ୍କ ବିରୋଧରେ କାର୍ଯ୍ୟାନୁଷ୍ଠାନ ମଧ୍ୟ ନିଆଯାଇପାରେ । ନିୟମ ମୁତାବକ ଯଦି ଜଣେ କାର୍ଡଧାରୀଙ୍କ ପାଖରେ ନିଜର ଏକ ପ୍ଲଟ୍ ଅବା ଫ୍ଲାଟ୍ ଥିବ ନଚେତ୍ ୧୦୦ବର୍ଗ ମିଟରର ଘର ଥିବ ସେମାନଙ୍କ ରଦ୍ଦ ହେବ ରାସନକାର୍ଡ । ଏହାସହିତ ଯେଉଁମାନଙ୍କର ୪ଚକିଆ ଯାନ, ଅସ୍ତ୍ରଶସ୍ତ୍ରର ଲାଇସେନ୍ସ, ଗାଁରେ ୨ଲକ୍ଷରୁ ଅଧିକ ଓ ସହରରେ ୩ଲକ୍ଷରୁ ଅଧିକ ଆୟ ଥାଏ ତେବେ ସେମାନଙ୍କର ରଦ୍ଦ ହେବ ରାସନ କାର୍ଡ । ଏପରି କି ସେମାନଙ୍କୁ ଅଯୋଗ୍ୟ ମଧ୍ୟ ଘୋଷିତ କରାଯିବ । ତେଣୁକରି ଜରିମାନା କିମ୍ବା ଅଯୋଗ୍ୟ ଘୋଷିତ ହେବା ପୂର୍ବରୁ ଏମାନଙ୍କୁ ନିକଟସ୍ଥ ତହସିଲ କିମ୍ବା ଡିଏସଓ କାର୍ଯ୍ୟାଳୟରେ ରାସନ କାର୍ଡ ଫେରାଇବାକୁ କୁହାଯାଇଛି ।