ଗୁରୁଜୀ ଅଧିକ ପାଠ ଲେଖିନି, ଯାହା ପାଠ ପଢିଥିଲି ସେ ପ୍ରଶ୍ନ ପରୀକ୍ଷାରେ ପଡ଼ିନି । ଏଣୁ ମୋତେ ଉତର ଆସିଲାନି ମୁଁ କମ୍ ଲେଖିଛି । ଦୟାକରି ମୋତେ ଫେଲ୍ କରିବେନି । ମୋର ଭବିଷ୍ୟତକୁ ନଷ୍ଟ କରନ୍ତୁନି । ଏହା ମିଠାଇ ଖର୍ଚ୍ଚ ବାବଦକୁ ଆପଣ ନେବେ । ଏଭଳି ଲେଖିବା ସହ ନିଜ ନିଜର ଉତରଖାତାରେ ୫ ଓ ୨ହଜାର ଟଙ୍କିଆ ନୋଟ୍ ରଖିଛନ୍ତି ଛାତ୍ରଛାତ୍ରୀ । ଉତରପ୍ରଦେଶରେ ଦ୍ୱାଦଶ ବୋର୍ଡ ପରୀକ୍ଷା ଦେଇଥିବା ଶିକ୍ଷାର୍ଥୀଙ୍କ ଉତରଖାତାରେ ଏଭଳି ଦୃଶ୍ୟ ଦେଖିବାକୁ ମିଳିଛି । ପରେ ଖାତା ମୂଲ୍ୟାଙ୍କନ କରୁଥିବା ପରୀକ୍ଷକମାନେ ବି ଏପରି କାର୍ଯ୍ୟ ଯୋଗୁଁ ଆଶ୍ଚର୍ଯ୍ୟ ହେବା ସହ ଅସୁବିଧାରେ ପଡିଛନ୍ତି । ଉତରଖାତା ଚେକିଂକୁ ଇତିମଧ୍ୟରେ ୭ଦିନ ବିତିଯାଇଥିବା ବେଳେ ଶିକ୍ଷାର୍ଥୀଙ୍କ ଖାତାରୁ ମିଳିସାରିଲାଣି ୧୫ହଜାର ଟଙ୍କା ।
ନୋଟ୍ ମଧ୍ୟରେ ଶହେରୁ ଆରମ୍ଭ କରି ୫ଶହ ଏବଂ ୨ହଜାର ଟଙ୍କିଆ ନୋଟ୍ ମିଳୁଛି । ପଦାର୍ଥ ବିଜ୍ଞାନ, ଗଣିତ ଏବଂ ରସାୟନ ବିଜ୍ଞାନର ଉତର ସିଟରେ ସର୍ବାଧିକ ପରିମାଣର ଟଙ୍କା ମିଳିଥିବା ଜଣାପଡ଼ିଛି । ସୂଚନା ମୁତାବକ ଉତରପ୍ରଦେଶର ବାରଣାସୀ ଜିଲ୍ଲାର ୪ଟି ମୂଲ୍ୟାଙ୍କନ କେନ୍ଦ୍ର ପ୍ରତିଷ୍ଠା ହୋଇଛି । ସରକାରୀ କୁଇନ୍ସ ଇଂଟର କଲେଜ ଏବଂ ପିଏନ୍ ସରକାରୀ ଇଂଟର କଲେଜରେ ଇଂଟର ଶିକ୍ଷାର୍ଥୀମାନଙ୍କ ଉତର ପୁସ୍ତକ ଏବେ ଯାଂଚ୍ କରାଯାଉଛି । ପରୀକ୍ଷାର୍ଥୀମାନେ ପରୀକ୍ଷାରେ ପାସ୍ ମାର୍କ ପାଇଁ ସବୁଜ, ଗୋଲାପୀ ନୀଳ ଏବଂ କମଳା କଲର ନୋଟ୍ ଉତରଖାତାରେ ରଖିଥିବା ଦେଖାଯାଉଛି । କିଛି ପରୀକ୍ଷକ ନୋଟ୍ ପାଇ ଚକିତ ହୋଇଯିବା ସହ ମନେ ମନେ ହସୁଛନ୍ତି । ଏଭଳି ଖବର ଏବେ ସୋସିଆଲ ମିଡ଼ିଆରେ ବେଶ୍ ଭାଇରାଲ ହେବାରେ ଲାଗିଛି ।
