ଓୟୋ ହୋଟେଲରେ ଝୁଲିପଡ଼ିଲେ ଯୁବକ

ଋାଜଧାନୀ ଭୁବନେଶ୍ୱରର ଏକ ଓୟୋ ହୋଟେଲରେ ଝୁଲି ପଡିଲେ ଜଣେ ଯୁବକ । ଯୁବକଜଣକଙ୍କ ମୃତଦେହ ସନ୍ଦେହଜନକ ଅବସ୍ଥାରେ ଉଦ୍ଧାର କରିଛି ପୋଲିସ । ପ୍ରେମିକାର ଓଢଣୀରେ ଝୁଲି ପ୍ରେମିକ ଆତ୍ମହତ୍ୟା କରିଥିବା ଅଭିଯୋଗ ହୋଇଛି । ରାଜଧାନୀସ୍ଥିତ ଜାଗମରାର ଏକ ଓୟୋ ରୁମରୁ ଉଦ୍ଧାର ହୋଇଛି ଏହି ଯୁବକଙ୍କ ମୃତଦେହ । ମୃତ ଯୁବକ ଜଣଙ୍କ ଦୁର୍ଗା ପ୍ରସାଦ ମିଶ୍ର ଓ ତାଙ୍କ ଘର ନିଆଳି ଜଲାରପୁରରେ ଅଂଚଳରେ ବୋଲି ଜଣାପଡ଼ିଛି । ସେ ଭୁବନେଶ୍ୱରରେ ଜଣେ ଠିକାଦାରଙ୍କ ପାଖରେ ରହି ଚାକିରୀ କରୁଥିଲେ । ତେବେ ଦୁର୍ଗାପ୍ରସାଦଙ୍କ ପରିବାର ଲୋକେ ଏହା ଆତ୍ମହତ୍ୟା ନୁହେଁ ବରଂ ହତ୍ୟାକାଣ୍ଡ ବୋଲି ଅଭିଯୋଗ କରିଛନ୍ତି । ସୂଚନା ମୁତାବକ ଜନ୍ମଦିନ ପାଳିବାକୁ ଦୁର୍ଗା ପ୍ରସାଦ ସାଙ୍ଗମାନଙ୍କ ସହ ହୋଟେଲକୁ ଆସିଥିଲେ । ସେ ତାଙ୍କର ୩ ସାଙ୍ଗଙ୍କ ସହ ବାର୍ଥ ଡେ ମନାଇବାକୁ ଘରୁ ବାହାରିଥିଲେ । ଜାଗମରା ଅଂଚଳରେ ଏକ ଓୟୋ ହୋଟେଲରେ ପାର୍ଟିର ଆୟୋଜନ ବି ହୋଇଥିଲା । ସେହି ପାର୍ଟିରେ ଯୁବକଙ୍କ ବାନ୍ଧବୀ ଓ ଅନ୍ୟ ୨ଜଣ ବନ୍ଧୁ ବି ଉପସ୍ଥିତ ଥିଲେ । ହେଲେ ପାର୍ଟିରେ କ’ଣ ହେଲା କେଜାଣି ହଠାତ୍ ଆଜି ସକାଳୁ ଦୁର୍ଗାପ୍ରସାଦଙ୍କ ମୃତଦେହ ଉଦ୍ଧାର କରିଛି ପୋଲିସ । ଘଟଣାସ୍ଥଳରେ ଖଣ୍ଡଗିରି ଥାନା ପୋଲିସ ପହଂଚି ଅଧିକ ତଦନ୍ତ କରୁଛି । ମାତ୍ର ଆତ୍ମହତ୍ୟାର କାରଣ ସମ୍ପର୍କରେ ଏଯାଏଁ କିଛି ବି ଜଣାପଡ଼ିନି । ଏନେଇ ଦୁର୍ଗାଙ୍କ ସାଙ୍ଗମାନଙ୍କୁ ଅଧିକ ପଚରାଉଚରା କରୁଛି ପୋଲିସ । ମୃତ ଯୁବକଙ୍କ ମୋବାଇଲକୁ ଜବତ କରି ପୋଲିସ ତଦନ୍ତ ଜାରି ରଖିଛି । ସେହିପରି ଭୁବନେଶ୍ୱର ଡିସିପି ପ୍ରତୀକ ସିଂ ଏ ସମ୍ପର୍କରେ କହିଛନ୍ତି, ପରିବାରର ଅଭିଯୋଗକୁ ଆଧାର କରି ପୋଲିସ ତଦନ୍ତ କରୁଛି । ସବୁ ଦିଗକୁ ନେଇ ତଦନ୍ତ କରାଯିବ । ଶବ ବ୍ୟବଚ୍ଛେଦ ରିପୋର୍ଟ ଆସିବା ପରେ ଏହା ହତ୍ୟା ନା ଆତ୍ମହତ୍ୟା ସେ ସମ୍ପର୍କରେ ସ୍ପଷ୍ଟ ହେବ ବୋଲି କହିଛନ୍ତି ଭୁବନେଶ୍ୱର ଡିସିପି ।